1Th 3 | GAM | STEP | Ge pille, no tau kanan namopin, no ye mor mal ola dje pupon dje pille, no nomane embe pai, no soka dumo Atens molo pambollka,

1 Thessalonians 3

Pol dumo Tesalonaika una aglo gi djine dje pille Timoti dje wori pi

1 Ge pille, no tau kanan namopin, no ye mor mal ola dje pupon dje pille, no nomane embe pai, no soka dumo Atens molo pambollka, 2 nono agane God kogoye aike yei una Timoti dje worpin ye moi al woi. No Timoti ye moi al wo Krais kandjiyembe wopake dje aundaka, ye pillgine dongall panda dje yepin. 3 Embe yepin ge ye imb kake mor mal, ye pille urup dje djine dje pille yepin. Ye kaninj, God dji mal pille nono imb embe kakbon mal pai. 4 No ye boll mopin poke, imb kayekaye nono boll wonda we djipin. Ye kaninj, ege ke ge pillau dji pora dji. 5 Me ge pai pille, na kui alla nayell. Ye pillgi djinj mal Timoti wo na dje aunda piyo dje pille, dje worill ye moi al woi.

Timoti er yem wo kandjambe wopake toi Pol wo pi

6 Timoti ipon ye kere er yem wo kandja wopake dji. Ye pillgi dje, una kane wopake yenj mal kandjambe to no awi. Ye no wopake pille awi mal dje awi pupin. Une kandja embe dji, no ye kanbon dje pirmon mal ye no para embe kanbon dje pille mor we dji. 7 Agana abana kambono, ye pillgi dongall pai pille, no kane imb urup kakmon al ge aglo gi djinmon. 8 Ye Iwa Kerman boll aglo gi dje mor pille, no nomane wopake pai mormon. 9 No God nale al ye pille wo mabinta pirmon mal ge no une kune merke wopake we dje aunmon, ba yenmon ge kune nayendo, wo kaima pirmon. 10 Imina armina no nomane wopake boll kamang embe yenmon. God ye wordaka no wo ye kanbonka, ye pillgine kune napi dal, no ye worbonka alla kerman panda dje kamang yenmon.

God ye wordaka Pol ga kanno dje kamang yei

11 Nono Nane God ne, nono Iwa Kerman Jisas kondwe to aumbellka, no ye mor al wombon dje pirmon. 12 Iwa Kerman ye wordaka ye yenekne wopake kane yenj mal ge ne, ye una porapora kane wopake yenj mal ge, yake wo er kerman punda. No ye wopake kanmon mal ge embe pandambe. 13 Nono Iwa Kerman yene unakye wopake ta mal mor ge boll yem wonda poke, nono Nane God ye wordaka ye une nale al yembene pandaka wambo napanda moye.